沪语童谣笃笃卖糖粥幼儿版（沪语悦读老卜糕）

因为疫情一直蹲勒屋里出勿去，储备蔬菜是绝大多数家庭无法绕开个选项，其中，老卜是要也要、勿要也要个重要品种，阿拉有充分理由接受伊。

“冬吃老卜夏吃姜”个熟语告诉大家：老卜是冬令蔬菜。葛末，现在已是暮春，阿拉吃个老卜好像搭冬老卜无关了？其实勿对个。老卜个成熟期覆盖一年四季，春老卜勒5月-7月之间，夏老卜勒7月-8月之间，秋老卜勒9月-11月之间，冬老卜勒12月到来年1月-2月之间。所以么，阿拉搿歇吃到个老卜，可能还勒勒承接冬老卜个余绪唻，讲伊“正当时”么，勿靠谱，讲“反季”么，像煞是也勿搭界。

坊间另外有句“老卜上市，郎中下岗”个讲法，估计按照目前个形势，假使有人还秉持迭个执念，让“大白”靠边，乃末就要让大家笑话了。

必过呢，老卜是传统药菜，伊个营养价值勿一定输拨人参，古代医典记载得邪气多，此地勿需要啰嗦了。所以，各家各户尽管老卜“造造反反”，但是侬勿去“招安”伊，是勿讲道理个。

用老卜烧菜可以有交关种烧法，譬如讲，高级点个鲍汁老卜，普通点个葱油老卜丝，诸如此类，相信勿少人老老熟悉个。

交关人勿晓得老卜还可以当饭。北宋杨亿《杨文公谈苑》里向记载:

江东居民，岁课种艺，初年种芋三十亩，计省米三十斛；次年种老卜二十亩，计益米三十斛，可知老卜消食也。更始败，掖庭中宫女数百人幽闭殿门内，掘庭中芦菔根食之，今老卜是也。

英国作家笛福勒《鲁滨逊漂流记》里向也写到了类似个故事：

我有一包钞票，金币也有，银币也有，大约摸值三十六金镑。但是，搿些倒霉个、没用个物事，至今还摆勒伊面，对我一点用场也呒没；我常庄想，我情愿用一大把钞票去调……价值六便士个英国莱菔（就是老卜）搭红老卜个种子……

由此观之，特殊个辰光，老卜赛黄金，真个勿是瞎讲八讲，勿拿老卜当桩事体是极其错误个。

时至今日，老卜当饭简直“天方夜谭”了，必过，侬哪能晓得自家绝对勿会是下一个“鲁滨逊”呢？

勒目前手边食材调配勿够充分个场景之下，一日到夜重复个老卜菜确实有点吃厌脱了，迭个辰光，老卜点心可以跟进，一方面调调口味，一方面物尽其用，何乐而不为？老卜丝油墩子、老卜丝煎饼、老卜丝酥、老卜丝蟹壳黄……此时此刻，想起伊些平时勿起眼个小点心，馋唾水溚溚渧了呀。遗憾个是，搿些点心油水过重，难免为人忌惮。葛末，是勿是可以尝试吃吃老卜糕呢？

网浪向有各式做老卜糕个攻略，路数勿外是——大米磨成功米浆；老卜刨成功细丝烧熟，腊肉、腊肠切成功细粒，开洋用油炒香，再加各种调料，趁热倒入米浆里向；搅成糕坯之后用蒸笼蒸；期间可以勒糕个表面浪向撒眼开洋搭仔腊肉个碎碎；续蒸之后晾一晾，冷下来切块，蘸点蒜蓉酱油品尝。

看起来并勿复杂。

值得一提个是：老底子勒广东、福建伊面流行个老卜糕，对米粉个要求邪气高，非“在来米粉”勿用。

所谓“在来米粉”，是一种粘性比较大个粳米粉。

假使实在弄勿到“在来米粉”，我想糯米里向加点粳米应该可以将就个伐。

老卜糕看上去流派邪气多，广式、闽式、台式、港式咾啥，但是基本浪大同小异，万变勿离其宗：粘米、腊肉、开洋。我最欣赏开勒上海前滩太古里旁边、专营正宗顺德菜个“山海潮”出品个老卜糕，伊拉个特点是精致考究，人有我有，我有人无，譬如导入瑶柱，再譬如表面撒白芝麻，又譬如配秘制蒜蓉辣椒酱……尤其是伊用马蹄粉来替代粘米粉，显得别出心裁，风味独特，令人难忘。

毫无疑问，老卜糕是一味点心；而对我来讲，则是一道菜。没错，我从来呒没拿伊当作点心：咸滋滋、鲜葳葳、嫩生生、滑溜溜、软咚咚、香咪咪，佐酒过粥，无不惬意。事实浪，粤闽港台地区个一些菜，常庄请老卜糕加持，啥个老卜糕汤、xo酱老卜糕、芥兰炒老卜糕……热闹非凡。

老卜糕个“前世”材料少见少有；就算有，恐怕也勿容易配齐。我寻到南宋林洪《山家清供》里个一条：

东坡一夕与子由饮，酣甚。槌芦菔（就是老卜）烂煮,勿用他料，只研白米为糁。食之，忽放箸抚几曰:“若非天竺酥酡，人间决无此味。”

粉碎个大米里向掺进老卜泥加以烹饪，我猜，勿就是老卜糕个雏形嘛？

呵呵。疫情当前，既能健体又可果腹个老卜糕是可以左右逢源个；并且，阿拉还真个要跟老卜学一学——“一只老卜一只坑”——保持恰当个社交距离，让新冠病毒早点滚蛋伐！

作者：西坡

讲述：何秀萍

丁迪蒙

迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。

沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。

沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。

丁迪蒙所撰写的，与沪语相关的著作主要有：

《学说上海话》上海科技文献出版社

《听听说说上海话》少年出版社

《实用沪语》复旦大学出版社

《上海话绕口令》少儿出版社

《上海方言词语使用手册》上海教育出版社

《上海话读成语故事》少儿出版社

《囡囡学童谣》，少儿出版社。