怎么去电影里当龙套 客串勿是跑龙套

↑ ↑ ↑

边听语音

边看文字

↓ ↓ ↓

今朝讲个是“客串”。

“客串”勿是“跑龙套”，是讲有辰光请一位非专业演员临时来演个角色，角色倒不论大小，但是“客串”搿桩事体还是有眼讲究个。

电影厂拍戏，图方便省钞票，葛末有辰光就会得拉其他工种个人帮帮忙，镜头前头套一件戏里厢个服装立一立，有辰光还讲两句台词，勿拆穿观众是晓也勿晓得个。因为电影厂里底人大多精怪来兮，摄影棚里蹲个辰光长了，一天看到夜，镜头前头立了嗨一眼也勿紧张，做戏交关放松，交关自然。碰巧客串一个有噱头个角色，真是出彩得邪气！弄得勿好抢脱主角个风头，畀观众留下深刻个印象。

老爷叔刘琼讲过，碰着搿种情况，老鬼点个大明星就会事先对迭位客串朋友打个招呼：晚歇点正式开拍帮帮忙，大家覅抢戏，今朝戏结束，夜点心我来。迭个就叫做大家乐开，做人上路。

刘琼老爷叔还讲过一桩客串大豁边个事体。电影厂有位大家蛮熟悉个苏州老阿姨，专门帮女演员梳古装头个化妆师，平常着得清清爽爽，慈眉善目，交关和气。一趟导演请伊客串，做戏里头韩兰根个娘。

中国版“劳莱哈台”韩兰根&殷秀岑

韩兰根迭位老明星大家应该晓得，又瘦又小像只猢狲，专门搭档大胖子殷秀岑演喜剧人物，迭个是从好莱坞学得来个“劳莱哈台”一对宝货。韩兰根戏演得好，一九三〇年代老电影《渔光曲》里，伊搭王人美演姊弟两家头交关出名，还辣著名大导演孙瑜个经典名片《大路》里同金焰、刘琼、郑君里配过戏。当时伊拿个片酬最高，可见是绝对出名。迭趟哪能挨着仔同苏州阿姨演一对母子，真勿晓得碰着点啥。

事出梳头阿姨从影有眼年头，摄影棚里炼成精了，真个叫“进戏快，入戏深”！导演一声：“开麦拉！”阿姨就一声：“兰根儿……”拖长仔个苏州口音中气邪气足，糯是糯得来，满满的慈母情。要勿是拍个辰光同期录音，保险大家一道喊“好”。勿晓得边浪向帆布矮凳浪向坐个导演急煞了，连忙叫：“Cut！Cut！停！停！停！”伊讲：“韩兰根辣戏里勿叫韩兰根！NG，NG！重来！重拍！”

迭句闲话讲好摄影棚里笑翻了天。连得蒙辣被头洞里厢个摄影师也掀开被头屏勿牢笑出来。迭辰光摄影机用得老了，里厢牙齿移脱了，拍起来拖了暗盒里个片子走起来哗哗响，葛末只好服装仓库里抱一条厚被头出来，开拍个辰光拿摄影师连人带机器一道蒙牢，只露出只镜头辣外头，葛末机器走个声音好轻点，否则同期录音哪能弄法子呢。

勿是讲笑话，有趟拍戏同期录音，半当中有人放了个屁，外加来得个响！急得录音师急叫：“停！停！有人放屁！”葛末只好停脱重来，几化浪费。接下来再拍个辰光，导演就讲：“安静！正式开拍了！不要讲话！”边浪个制片主任还加一句：“不要放屁！”乃末摄影棚一片混乱，闹猛仔半日天。搿个勿是段子，厂里厢传了交关交关辰光，一底录音师提起搿桩事体就头痛得勿得了……

葛末无轨电车开转来。当时摄影棚里只有导演一家头笑勿出，伊辣辣认认真真稳定苏州阿姨情绪，讲：“阿姨，侬刚刚搿声‘兰根儿’交关有感情，我听了眼泪水都要落出来了。晚歇点重拍侬还是要实梗叫伊，糯笃笃软绵绵，就是名字孬再叫错脱，千万记牢伊戏里勿叫韩兰根。”

迭只镜头重拍，导演讲“好”，葛末事体算过脱了咯？但是后头韩兰根个日脚难过了。当时棚里厢就有老演员对苏州阿姨讲：“倷哪亨勿多餵点畀个儿子吃吃，看俚瘦得来像只青肚皮猢狲。”阿姨也笑得来，讲：“孬怪我勿畀俚吃饱饭，俚天生个哇!”从此以后，韩兰根去到啥地方，但凡只要碰着厂里厢个熟人，尤其是两个同道师兄弟，定规有人喊伊一声：“兰根儿……”还要学足了苏州阿姨个口音，拉长仔糯笃笃软绵绵个声调，有辰光边浪还有人会得答应一句：“唉……”迭个真是弄得韩兰根哭笑不得，恨不得地浪有只洞钻进去。

电影是舶来品，电影界受好莱坞影响蛮严重的。工作上用了勿少英文术语，譬如“开麦拉”是摄影机个英文读音，勿晓得哪能变成了导演喊开拍的口令，外国人也勿是实梗叫法。葛末现在改过来了，导演叫“开始”。Cut，英文是切、断，是导演喊“停拍”个指令。NG是英文No Good个缩语，意思是“勿好，拍坏脱了，迭只镜头画面勿能够用”。多多少少洋泾浜，不过大家用惯了、喊惯了也成为自然。

冯小刚客串杜月笙

顶有劲是有点导演看人家演戏，自家个表演欲就吊上来了，也来轧一脚、凑个角色、过过念头。譬如著名导演冯小刚，索性做一部片子个主角，痛痛快快过把瘾。不过老实讲一句，伊演迭种皇城根儿个地痞流氓“老炮儿”是蛮灵个，不过客串杜月笙，就是“四大金刚摇船”——大推大扳了，不过冯导要进入“海上闻人”个角色，也实在忒难为伊了。

过去有个英国导演希区柯克，跑到好莱坞大发展，拍了交关好看个悬疑片，像《后窗》《鸟》《女贼》等等，算是经典的。英国女王老太太因为忒喜欢看伊个片子，还封伊做了个爵士。

希区柯克客串路人

希区柯克辣辣伊自家拍个片子里总归要露一露脸，摆一只客串个镜头画面进去，伊讲搿是辣自家片子里做个标记。但是伊有本事叫倷寻不着搿只客串镜头，赛过搭观众辣辣盘夜猫猫，搿本事勿是一眼眼。介许多影迷看伊个片子，因为畀剧情个张力所吸引，看好以后再想起，啊呀，忘记脱寻导演客串个迭只镜头画面了！葛末再买张票子重新坐进电影院里再去看第二遍。我也做过迭种戆事体，总算畀我捉牢：戏里厢希区柯克胖得像只超大型个莱阳梨，手里捏只大提琴盒子（也是一只大生梨），正要踏上一部公共汽车。老式公共汽车搿扇门勿像今朝底介大介宽舒，我想看看清爽，伊实梗郎戆法子，哪能好上车子？想不到镜头画面就一记头没了。希区柯克个客串镜头刁钻促狭，存心骗倷再去看第二遍，葛末好扩大票房价值咯，不过伊拍个片子是蛮好看，老虽然老，多看两遍也蛮值得。

有兴趣个朋友，可以到网浪向调一调、寻一寻，现在手机随放随停，倷要捉起伊个客串镜头来是便当得多了，外加伊个大腹便便个样子还是蛮好寻个，片头海报浪向也常常有，勿会搞错脱。

读白|杨仲文

文编| Ⓒ.Ⓛ

美编|Ⓗ.Ⓨ.Ⓟ

图片来源于网络