广州话粤语一学就会（好多常用嘅粤语词你一直都打错咗）

网络世代，写嘢或倾偈以粤语成文甚为常见。然而大多数人不求甚解，只以同音、近音字代替，贯彻「睇得明就得啦」之「是是但但」精神。长此以往，以讹传讹，错字泛滥。为此，略举数例，附上正误对照，以起提醒之效：

1、搞定——>搞掂

2、买单——>埋单

以上两例皆南词北传，再经改造后反转影响返粤人。

3、得5得嫁/嘎/价？——>得唔得㗎？

「唔」都唔写，好懒啫！55555～～

4、比/俾钱——>畀钱

「畀」即「赐」，可见诸大量古文中，讲多都谮气。

5、紧系唔得——>梗系唔得

「紧」、「梗」唔分，纯属懒音之过。

6、果度——>嗰度

「果」、「嗰」唔分，亦系懒音之过。

7、大锅饭年代——>大镬饭年代

「锅」、「镬」读音争好远，若然唔识分，就大镬。

8、做物嘢——>做乜嘢

所谓「乜乜物物」，你又着住对乜袜？完全唔同音，好难分咩？

9、讲咗滴乜也？——讲咗啲乜嘢？

用pinyin打字法嘅初哥常见错误。

10、膝头对上系大脾——>膝头对上系大髀/肶

脾脏变大髀，脾气差啲都激死。

11、怕距有牙——>怕佢有牙

「佢」同「距」，距离如此之远。

12、体戏——>睇戏

莫非爱情动作片简称「体戏」？

13、我噶师傅喺黄飞鸿——>我嘅师傅系黄飞鸿

系：是；喺：在。「噶」系咩嚟？碌噶？

14、用脑淋也——>用脑谂嘢

皆因个脑淋过嘢，入晒水，先至谂唔到要写个「谂」。

15、痴线——>黐线（「线」、「线」为异体字，两者皆可）

痴：痴情；黐：粘合。虽则好多痴情汉都黐黐地，但黐线佬未必痴情㗎！

16、中意——>钟意

「一见钟情」，「正中下怀」，一个平声，一个去声，你钟意读边个音？

17、冇订企——>冇埞企

冇订坐位，唯有企住，边间茶楼咁旺？

18、恰眼瞓——>瞌眼瞓

中午瞌一瞌，好过饮鸡汁，瞌醒之时，恰好两点正。

19、唔洗/驶客气——>唔使客气

「客气」洗唔走，亦驶唔开，之但系好使得，善（使）用客气语，敌人都变老友。

须知道，粤语亦有规范可循，并非「求其up个音」之次等语言（注：「up」应写「噏」）。有意「我手写我口」之老友记，慎之，慎之！

来源：國民粵語會