广州广播电视台广视小记者节目（羊城网问羊城人）

羊城网问羊城人

广州从不缺文化，更不缺乏文化人。只不过，广州人太低调太务实了，这种性格已经植根在他们的文化基因之中，只愿默默做事，而不好出风头。《羊城网问羊城人》栏目，由总编辑小劳亲自采访每一位为默默为广州本土文化作出贡献的意见领袖，揭示他们低调务实背后的努力和成果。

本期嘉宾：少爷明

电视、电台节目身兼主持、配音、演员三合一

纵横广州地区电台、电视界……就算你未见过佢个样（绝对冇可能佢个样咁出位咁容易认），都必定会听过佢把声同个名，佢就系《粤夜粤娱乐》、《今晚大件事》、《吾系讲笑之怪谈热线》、《S计划》、《时事查笃撑》、《食蕉英雄传》、《搵食珠三角》、《拉阔新生活》、《至得美食导航》……数都数唔晒甘多电视、电台节目身兼主持、配音、演员三合一嘅 精精灵灵少爷明啦！

劳：可唔可以讲讲你当初系点入行做一个粤语主持人？

明：当年入行真系源于一个广播梦，细细个听电台真系一件好玩又好潮嘅事，于是一毕业冇耐就遇到当年芦苇琪节目招助手，我好记得当日报名嘅人逼爆咗花果山广州电台饭堂，壮观到呢！最后打赢晒200几个参赛嘅人（唔好忘记只系招个助手都闲闲哋200几人报名，但我当时……其实……真系……未听过芦苇琪节目，哈哈哈）成为咗节目《芦苇的琪想》嘅星座小骗子阿Ming啦！

劳：要担任粤语主持人对粤语水平有啲乜要求？系咪会有专门嘅粤语水平测试呢？

明：我哋当年入行对粤语嘅水平反而唔系最重要，最重要系对主持人个性、节目创意比较睇重，但听前辈讲以前入行系需要有一年嘅行业培训，都包括咗粤语水平嘅培训，我哋啲后辈就全靠天分同后天努力啦！

劳：粤语主持人嘅发掘会唔会比普语主持困难，要求会唔会比后者更高？

明：讲真，喺广州就绝对系普语主持人难搵啦，粤语主持人遍地都系，所谓嘅发掘就要睇每一个频道、栏目嘅要求啦，好似某啲新闻节目个记者成口乡音，监制反而觉得贴近市民，咁对粤语要求好高？呵呵

劳：对于娱乐节目同饮食节目，你钟意主持主持边个多啲？点解？

明：对我来讲成为一个全能嘅主持人先系最终目标，作为一个水瓶座我更中意不断有新挑战，所以你问我做甘多唔同类型嘅节目我更中意边个？我只能够回答我个个都咁爱，因为每个节目我都用心去做，一系唔做一做就做到最好！

劳：作为一个粤语主持人，你对未来有啲咩事业规划？

明：喺我心目中粤语除咗系我嘅工作，仲系我嘅生活、我嘅沟通方式、我嘅情怀、我嘅血统！所以一日我喺粤语嘅地域做主持我都觉得自豪！

劳：包括港澳在内，有边啲粤语节目，你系比较欣赏嘅，认为可以值得学习嘅呢？

明：相对于电台、电视嘅粤语节目，我更加中意粤语配音节目、电影、电视剧，我中意听粤语发音！

劳：经常有网友喺羊城网批评广东一啲粤语节目主持人或者记者嘅粤语唔纯正，带有乡音或者用咗大量普通话词汇同语法，你点睇呢种现象？

明：随著时间嘅推移、骨质嘅疏松，广州作为一个包容嘅城市，就肯定会出现呢种现象，好正常！就算其他粤语区域讲嘅粤语发音都系一代不如一代，语言本来就系一种沟通工具，年代唔同产生嘅词汇唔同都好正常！所以一切都咁正常又做咩鸡蛋里面挑骨头啊，讲好粤语由自己做起，系有心嘅就有动力学好讲好噶啦！

劳：如果有朋友想入行成为粤语主持人，你会有咩建议？

明：喺呢个全城自媒体嘅年代，大把机会做主持人，无论咩语言都好，有自己风格嘅，有创意嘅，捉得住听众观众嘅都系好嘅主持人！加油！

,